'Ɩn nɩɛ 'kmʋ 'ma muɛ Tʋ "bo 'a nʋʋdɩ 'nynɩ ‑saa'
118
Ao 'bɛɛ‑ Tʋ "bo 'nynɩ 'a "i,dɛ ‑nʋɛ ɛ nmɔ 'diwɔn,
ɛɛ' nyʋ 'a ‑tɩ' kmaa' se "ti ‑ta 'ble.
2 Ao ‑sɛ 'nynɩ, Israɛ 'a 'cɛ:
kɩɩn, ɛɛ' nyʋ 'a ‑tɩ' kmaa' se "ti ‑ta 'ble.
3 Ao ‑sɛ 'nynɩ, Arɔn 'ɔ "ji ‑tbaai" ɛ:
kɩɩn, ɛɛ' nyʋ 'a ‑tɩ' kmaa' se "ti ‑ta 'ble.
4 Ao ‑sɛ 'nynɩ, ao nyʋ ‑a ‑gbɛɛ'‑ a Tʋ "bo "juɛi ɛ,
kɩɩn, ɛɛ' nyʋ 'a ‑tɩ' kmaa' se "ti ‑ta 'ble.
5 'De 'ma 'kle 'di 'ɩn nɩa, 'ɩn 'da Tʋ "bo,
‑wɛe ɛ kpʋn 'ma baewlu,
ɛ seie 'ʋn 'de 'ɩn ‑te 'ma ‑cɛ" ‑pee.
6 Tʋ "bo ‑nɩ 'ma nyɔ,
'ɩn se dɛ "o dɛjrɛ' plee i,
dɛ nyiɔpʋ‑ 'bɛɛ‑ ʋʋ 'je 'ʋn "jrii nʋɛ?
7 Tʋ "bo ‑nɩ 'ma nyɔ, ɛɛ ‑teɛ' 'ʋn kwa wɛi.
'Ɩn 'beeɛ kaan ka,
'ɩn ke nyʋ ‑a ‑flɛɛn a 'ʋn ‑wee'‑ "klein 'je "juua "i ‑tee'‑.
8 Tʋ "bo nɩ ‑ma sro' 'wlaa ‑ta "paa',
ɛ je ‑ɩn ‑te' ‑ma ‑cɛ" nyiɔ kwa ‑sii.
9 Tʋ "bo nɩ ‑ma sro' 'wlaa ‑ta "paa',
ɛ je ‑ɩn ‑te' ‑ma ‑cɛ" nyʋ klae" 'kwa ‑sii.
10 'Blʋɩ 'srʋ nyʋ ‑sea' Kea juuo ‑wee'‑ "klein ‑pin' 'ʋn ɛ:
'kaa 'de Tʋ "bo 'a 'saa 'ʋn ɛ, 'ma tʋ du ʋʋpʋ‑ 'mɛ.
11 Ʋʋa ‑pin' 'ʋn ɛ ka nyɔ ɔ "fian dɛ i ɛ,
'kaa' 'de Tʋ "bo 'a 'saa 'ʋn ɛ,
'ma tʋ du ʋʋpʋ 'mɛ.
12 Ʋʋ "fian 'mii ka dʋ a ma tu i ɛ,
'kaa ʋʋ ‑wee'‑ a 'wla jro',
ka sii" ‑gbauwo nɛ dia nɩa; kɩɩn,
'de Tʋ "bo 'a 'saa 'ʋn ɛ,
'ma tʋ du ʋʋpʋ‑ 'mɛ.
13 Nyʋ "tun 'ʋn 'ɛn 'de‑, ‑wɛe 'ɩn 'je i ‑ka;
'kaa Tʋ "bo 'wlʋɛ 'ʋn o.
14 Tʋ "bo ‑nɩ 'ma 'kpɩ, ɛmɛ ‑tɩ' 'ma ble;
ɛmɛ ‑pʋʋ 'ʋn.
15 'Mʋa‑ ke 'pʋ ‑cnuɛn" ke, ɩa 'kpaa' 'de "isrɛnyʋ 'a poo" ‑sɔn i!
Dɛ ‑nʋɛ, Tʋ "bo 'a "ikmaa' a nʋɛ dɩ "klae:
16 Tʋ "bo 'a "ikmaa' mɛ ‑kpa' tʋ 'a "jru,
Tʋ "bo 'a "ikmaa' a nʋɛ dɩ "klae.
17 "Ɩɩn, 'ɩn se 'mɛi, 'ma muɛ 'kmʋ nɩa',
‑wɛe 'ɩn 'je Tʋ "bo 'a nʋʋdɩ klae" 'tmʋ ‑ta ‑wee'‑ "klein.
18 Tʋ "bo ‑tuɛ" 'ʋn 'srɩn ‑gblein',
'kaa ɛ se 'ʋn 'mɛɛa' kwa bɔɔ‑.
19 Ao kain 'ʋn 'pʋ ‑je 'a kpaa" "wɛin,
'ɩn 'jeɛ "i paa‑, 'de 'ɩn 'je Tʋ "bo 'nynɩ ‑sa,
20 Tʋ "bo 'a ‑gbɛin" ‑je ka ‑ta;
'de ɛ "i 'de mɔ "isrɛnyʋ a mu paa'.
21 'Ma ji' ‑wɛe 'ɩn 'je ‑ma 'nynɩ "i 'bɛɛ‑,
dɛ ‑nʋɛ ‑ɩn kpʋn 'ma baewlu 'mɛ,
‑mɔ ‑pʋʋ' 'ʋn.
22 "Sou ‑gbu" poʋn pooa sʋn i ɛ,
ɛmɛ ‑ɛɛ "sou tu ‑snɛɛ "sou ‑cɛɛn' 'ʋn.
23 Ɛɛ' dɛtu 'wlʋɛ 'e Tʋ "bo 'ʋn:
Ɛ nɩɛ jrii' 'de ‑a "jri 'de.
24 'Wɩ Tʋ "bo nʋa ɛ ka ‑ta:
‑a ‑nʋʋɛ 'mʋa‑ i ‑a ‑je "mli.
25 Ɛɛ' 'saa 'ʋn 'a ‑tɩ 'ʋn, 'oo Tʋ "bo,
ɛ "nyɩ ‑aʋn 'pʋʋa'! Ɛɛ' 'saaʋn 'a ‑tɩ' 'ʋn,
ɛ "nyɩ ‑aʋn ‑pɔia".
26 Kɩɩn, "diwan‑ kpʋn "ju ‑ɔɔ jia 'de Tʋ "bo 'a 'nynɩ 'ʋn ɛ,
‑apʋ ‑nɩa 'de Tʋ "bo o ‑gbu" ‑sɔn ɛ,
‑aa poɛ ao ‑wee'‑ "klein "diwan‑!a
27 Tʋ "bo due' koun ‑gbai' ‑nɩ Kea,
ɛmɛ nɩ‑ ‑aa ‑sɔn' ‑aa ‑jee' "i ‑pe' saa.
Ao 'ble ‑gbʋn' kwa, ao 'kpa 'e ‑tɔn "i,
ao 'je mu mamaʋ 'sʋ,
ao 'jee 'sraa ‑sa na' nyni.
28 ‑Mɔ ‑nɩ 'ma Kea, 'ma muɛ ‑ma 'nynɩ "i 'bɛɛa',
'ma muɛ' ‑ʋn 'nynɩ ‑saa', 'oo 'ma Kea:
29 ao 'bɛɛ‑ Tʋ "bo 'nynɩ "i,
dɛ ‑nʋɛ ɛ nmɔ 'diwɔn,
ɛɛ' nyʋ 'a ‑tɩ' kmaa' a se "ti ‑ta 'ble.